Физика-математика ғылымдарының кандидаты, доцент, бақылау кеңесінің хатшысы – ғылыми хатшы, А. Байтұрсынов атындағы ҚМУ информатика кафедрасының профессоры ТАСТАНОВ МЕЙРАМБЕК ҒАБДУАЛИҰЛЫ 70-жасқа толып отыр.   С.М. Киров атындағы ҚазМУ-нің механика-математика факультетін бітірген соң, Тастанов М.Ғ. барлық саналы ғұмырын ғылым мен білімге арнады. Ол Әл-Фараби атындағы ҚазҰУ-нің математикалық ғылыми мектебінің көрнекті өкілі, альма-матер қабырғасында физика-математика ғылымдарының кандидаты ғылыми дәрежесін алу үшін диссертациясын сәтті қорғады, доцент ғылыми атағын алды. Оның еңбек жолы А. Байтұрсынов атындағы ҚМУ-мен тығыз байланысты, ол онда әр жылдары басшылық қызметтер атқарды, экономика және қаржы Институты директорының орынбасары, ҚМУ базасында облыстық қабылдау комиссиясының жауапты хатшысы болды, оқу-әдістемелік бөлімді және оқу-әдістемелік орталықты басқарды, сонымен қатар білім беру менеджменті және мониторингі басқармасының басшысы болды. Сондай-ақ, тәрбие жұмысы және қоғаммен байланыс департаментінің директоры, ақпараттық-талдау бөлімінің бастығы және стратегиялық даму департаментінің бас маманы болып қызмет атқарды. Ол Бақылау Кеңесінің Хатшысы болып сайланды және қазіргі таңда ғылыми хатшы лауазымында қызметін жалғастыруда. Оныңфильтрация, электротехника және қаржылық реттеу мәселелерін шешуге арналған 60-тан астам ғылыми және оқу-әдістемелік жұмыстары жарияланған. Ол Әл-Фараби атындағы ҚазҰУ механика-математика факультетіндегі «Тұтас орта механикасының шеттік есептері», «Механика мәселелері» ғылыми семинарлардың тұрақты қатысушысы. ҚР білім саласындағы еңбегі, оқу, тәрбие және әкімшілік қызметіндегі жетістіктері үшін және университеттің дамуына қосқан зор үлесі үшін Тастанов Мейрамбек Ғабдуалиұлына құрметті атақтар берілді: ҚР Білім және Ғылым Министрлігінің «Ғылымды дамытуға сіңірген еңбегі үшін» және «ҚР білім беру ісінің құрметті қызметкері» төсбелгілерімен марапатталды. Ол «Тың және тыңайған жерлерді игергені үшін» медалімен және басқа да көптеген медальдар, құрмет дипломдары және грамоталарымен марапатталған. Көп жылғы жемісті ғылыми-педагогикалық және ұйымдастырушылық-әдістемелік қызметі үшін Тастанов М.Ғ. лайықты құрмет пен беделге бөленді. Оның шығармашылық жолы жоғары кәсіби біліктілік пен үлкен еңбекқорлықтың ғана емес, сонымен қатар білім мен ғылымға қызмет етудің жарқын үлгісі іспетті.   Мейрамбек Ғабдуалиұлын мерейлі туған күнімен құттықтай отырып, оған зор денсаулық, бақыт, береке, ұзақ ғұмыр және Қазақстанның жоғары білімі мен ғылымын дамыту жолында шығармашылық табыс тілейміз.   философиядокторы (PhD) Амантаев М.А. аға ғылыми қызметкер «Агроинженерия ҒӨО» Қостанай филиалы    

Ұлттық болмысымыз бен рухымызды асқақтату мақсатында «Nur Otan» партиясының бастамасының «Менің Туым, менің Отаным!» акциясына А.Байтұрсынов атындағы ҚМУ де өз үлесін қосты. Патриоттық акцияның негізгі мақсаты - мемлекеттік туды тұрақты түрде қоғамдық орындарда, туристік нысандарда, сауда және ойын-сауық орталықтарында, жоғары және орта арнаулы оқу орындарында орналастыру болып табылады. Университеттің екінші корпусының залында мемлекеттік Ту орнатылып, мерекелік шара ұйымдастырылды. Салтанатты жиында «Nur Otan» партиясы Қостанай облыстық филиалы төрағасының орынбасары Алмат Досмұхамедов және Қостанай мемлекеттік университетінің әлеуметтік және шаруашылық жұмыстар бойынша проректордың м.а. Нұрлан Мамиев сөз сөйлеп, мемлекеттік рәміздерді құрметтеу әрбір қазақстандықтың парызы екендігін жеткізді. Шара барысында патриоттық әндер орындалды.    

А. Байтұрсынов атындағы ҚМУ-да студенттер аралас жекпе-жектен үш дүркін әлем чемпионы Ардақ Назаровпен жүздесті. Студенттер, оқытушылар, жас спортшылар ұлт жанашыры Ардақ Құттықожаұлымен жолығуға мол жиналды. Келген мейманды біразы түрегеп тыңдады. Әлем мойындаған чемпион осы спорт түріне қалай келді, қандай қиындықтардан өтті, жастар тәрбиесі, ер жігіттерге қандай қасиеттер тән болу керектігін айта отырып жастарды өз елінің патриоты болуға шақырды. Атақты спортшы жастармен кездесіп, отбасы құндылығы және бірлік, ынтымақ тақырыбында ой бөлісті. Кіші буын өкілдерін жігерлендіретін, намысын қайрайтын сөздер айтып, оларды ұлтжандылыққа, Отансүйгіштікке шақырды. Еркін форматтағы жүздесуге 300-ден астам студент қатысты. Шараның басты мақсаты – елге танымал тұлғалардың өнегелі өмірі мен ерен еңбектерін жастарды хабардар ету, отансүйгіштік, еңбекқорлық қасиеттерді қалыптастыру. Он төрт жасынан бастап еңбек етіп, өз киімі мен ішер асты адал жолмен тапқан Ардақ Назаров бүгінде ел таныған, әлем мойындаған спортшы. Ол жетістікке жеңіл жолды жүріп өтіп келмеді, керісінше қиындыққа қарсы тұрып, отбасының тірегі боламын деген асқақ арманмен адаспай келді. Жастар Ардақ Назаровтың ғибратты әңгімелерін, құнды кеңестерін тыңдауға құмартты. Өз сауалдарын қойды. Ардақ Құттықожаұлы ел тарихы мен адамгершілік жайында ойларымен бөлісті. Кез келген жанға ата-анадан артық адам жоқ екенін айтты. – Біз ата-анамызға жақсылық жасағымыз келеді. Қомақты қаржы жинап, қымбат сыйлық алуға ұмтыламыз. Әрине, ата-ананың бағалы сыйлыққа лайық екені белгілі. Десе де, мүмкіндік болмаса, жай ғана шынайы күлімдеп қарау, жеткен жетістіктерің де зор қуаныш сыйлайды. Ал олардың айтқанын тыңдамай, елеп-ескермеу – үлкен айып, – деді спортшы. Өнегелі лекция түрінде өткен тәрбиелік мәні зор кездесуде Ардақ Назаров өзінің бүгінгі жетістіктерге жетудегі иман, білім, тәрбиенің үлкен роль ойнағанын, талапшылдық пен күшті ерік-жігердің арқасында алынбас қамалдарды бағындыруға болатынын айтып өтті. Биіктерді бағындыруда өзінің өмірлік тәжірибесімен бөліскен чемпион имандылыққа негізделген әсерлі әңгіесімен студенттерді жігерлендіріп, ата-баба дәстүрін сақтау, ұлттық құндылықтарды дәріптеу, отанды сүю, ата-ананы қадыр тұту, досқа адал болу, ұстазды құрметтеу турасында насихат пен нақылға толы сүбелі сөздерін ортаға салды. Кездесуге келгендердің әр сөзді көкейге түйгендері байқалды. Расымен де, мейманның ел тарихын жақсы білуі, қазіргі ұрпаққа жетіспеген қасиеттерді атап өткені ұл-қыздарға, аға буынға ой салды. Жастармен жолыққанына жекпе-жек шебері де дән риза. Шара соңында келгендер мейманмен суретке түсті. Әрине, бірқатары Ардақ Назаров келді дегенді естіп, білім ордасына арнайы аяқ басты.  

Құрметті студенттер!⠀ҚМУ студенттер үйінде бос орындар бар екендігін еске саламыз. Жатақханадан орын керек студенттер жастар ісі бойынша комитетке жүгінсе болады (1А корпус, 103 кабинет)

Экономика және құқық институтының кафедралары А. Байтұрсыновтың мерейтойына арналған шаралар кешенін ұйымдастыруда. Осылайша, А. Байтұрсыновтың туғанынан 140 жылдығының аясында психология және педагогика кафедрасымен «Ақын махаббаты» атты әдеби кеш өткізілді. Студенттердің жылы лебізді шарасы Қостанай тумасының шығармаларын талдаумен және де оның өлеңдерін оқумен сүйемелденді. Сонымен қатар, психология және педагогика кафедрасы «А. Байтұрсынов халықтың рухани ұстазы» атты кураторлық сабағын ұйымдастырды. Заң мамандығы студенттерімен қазақтың көрнекті қоғамдық және мемлекеттік қайраткерінің есіміне орай арнайы бейнебаян түсірілуде. Осы шараларға 2-ші жыл магистранттары да белсене қатысып, үлесін қосуда. Бұл бағытта жұмыс жалғасын табады.  

А.Байтұрсынов атындағы ҚМУ «Журналистика» білім беру бағдарламасының студенттері қазан айының 23-і жұлдызында облыстық «Qostanai» телеарнасына экскурсияға барды. 2018 жылғы экскурсиямен салыстырғанда өзгерістер өте көп, техникалық жабдықтар жаңартылған. Экскурсия жүргізген Гүлнұр Қонарова студенттерді жылы шыраймен қарсы алып, телеарнадағы барлық мамандықтармен, әрбір студияның жұмысымен таныстырды.   Монтажер, дыбыс режиссері мен бағдарламалар режиссері, тележүргізушілердің жұмысын көріп, өз мамандығының міндеттеріне тағы да қанық болды. Республикалық «Хабар» арнасының меншікті тілшілерімен де тілдесіп, сұрақтарына жауап алды. Гульнур Какимбек.