Бүгін Қостанай қаласы бойынша Мемлекеттік кіріс басқармасының бас маманы Айнұр Амралиева  А.Байтұрсынов атындағы Қостанай мемлекеттік университетінің қызметкерлерімен  мүлікті жария ету және оны заңдастыру туралы заңдағы өзгерістер туралы баяндады.  Жаңа заңнама бойынша жария етілген мүлік және оны жария еткен тұлға туралы мәліметтер құпия  сақталады. Тіпті бұл мәліметтер құқық қорғау органдарының сұрауына да берілмейді.  Сонымен қатар мүлкін жария еткен тұлғалардың заңдастырған мүлкіне мемлекет кепілдік береді. Қазақстан Республикасының мүлікті жария ету Заңының 5-бабына сәйкес мүлікті заңдастырған тұлғалар өздерінің заңдастырған мүліктері және табыстары бойынша әкімшілік және құқықтық жауапкершіліктен босатылады.  Жеке жинағын жария еткен тұлға қаражатты есепшотқа аударып, арнайы декларация толтырған соң ешқандай салық төлемей, 5 күннен кейін қажетіне жарата алады.  Бұрын ақшаны 5 жыл банкте ұстау міндеттелген болватын. Ал жинағын есепшотқа аударғысы келмейтіндер жария ететін қаржының көлемін құжатта көрсетсе де болады. Бірақ мұндай жағдайда 10 пайыз салық төлейді.   Ұлттық заңнамаға енгізілген өзгерістерге байланысты 2014 жылдан бастап мемлекет тарапынан қолға алынған мүлікті заңдастыру науқанының мерзімі 2016 жылдың аяғына дейін ұзартылды. Заңдастыру мемлекет үшін де, ел азаматтары үшін де өзара пайдалы болмақ: бір жағынан жеке тұлғалар қолында бар мүлкін заңды айналымға шығаруға мүмкіндік алса, екіншіден, ел экономикасына заңдастырылған капитал мен мүлік түріндегі қосымша қаражат тартылады. Бұл науқан өзге мемлекеттердегі мүлікті, сонымен бірге өзге тұлғаның атындағы мүлікті заңдастыруға мүмкіндік береді. Заңдастырылған мүлік жеке тұлғаның кірісі ретінде саналмайды, тиісінше жеке тұлғаға қосымша салық салынбайды. Заңнамада арнайы шотта ақша сақтаудың бекітілген мерзімін сақтамаған жағдайда ақшаны заңдастыру бойынша алым төлеу туралы талап болмағандықтан, бүгінгі күні мұндай шотқа екінші деңгейлі банктер немесе «Қазпошта» арқылы ақша салған жағдайда жеке тұлғаларға алым төлеу міндеттемесі жүктелмейді. Заңдастырылған ақшаны жұмсау туралы қандай да бір шектеулердің болмауы қосымша стимул береді, себебі мұның өзі ақшаны құнды қағаздарға, жекешелендіру нысандарына, өзге де нысандарға инвестициялауға үлкен мүмкіндік тудырады. Осы науқан аясында мүлкін заңдастырушы тұлғаларды қорғау мақсатында заңда заңдастыру кезінде алынған құпия мәліметтерді сақтау туралы талап қарастырылған.

1-ші маусым күні ҚМУ-дың мәжіліс залында  Шайзада Тасболатова Қазақстандағы Эразмус+ бағдарламасының үйлестірушісінің қатысуымен «Математикалық инжиниринг бойынша есептеу орталықтарын және магистерлік бағдарламаны құру» жөнінде ECCUM мониторингі аясында  алғашқы кездесуі өтті. Мониторингтің мақсаты  жобаның  негіздеріне қол жеткізу үшін жүзеге асырылып жатқан  іс-шаралардың орындалу деңгейін тексеру болып табылады.   ECCUM жобасының А.Байтұрсынов атындағы ҚМУ –дегі жұмыс тобының мүшелері:   Федор  Майер - стратегиялық даму басқармасының бастығы, жобаның үйлестірушісі;   Елена  Кандалина - халықаралық қатынастар басшысы;   Оксана   Ярошенко–Бухгалтерлік есеп және есептеу бөлімінің бастығы;   Әбдікәрім  Байманқұлов– ақпараттық жүйелер кафедрасының меңгерушісі;   Талғат  Жуаспаев – ақпараттық жүйелер кафедрасының аға оқытушысы;   Ләззат Серкебаева  – ақпараттық жүйелер кафедрасының аға оқытушысы.  Халықаралық ақпараттық технологиялар университетіндегі  (Алматы қ.)   жұмыс тобының және жобаның  үйлестірушісі -  Гүлнара  Зәкірова кездесуге келгендермен танысты.  Сондай-ақ, Сантьяго-де-Компостелла университеті атынан  жобаның үйлестірушісі интернет желісі арқылы тікелей байланысқа шықты. Іс-шара барысында жұмыс тобының мүшелері жобаның негіздері  жөнінде ақпарат берді. Қазақстандағы ЭРАЗМУС+ мемлекеттік кеңсесінің үйлестірушісі Шайзада Тасболатова, жобаның жұмыс ережісі, әдісі мен тиімділігі жөнінде ақпаратпен бөлісті.  

31 мамыр — Саяси қуғын-сүргін құрбандарын еске алу күні. Бұл күн Елбасының жарлығымен  1997-жылдан бастап атап өтіледі.    Кезінде қазақ жері  миллиондаған кеңестік азаматтардың жер аударылған мекеніне айналған. Бұл көрсеткіш шамамен   1,5 млн.  адамды құрайды.    Осы кезең аралығында Қазақстанда 103 мың адам қуғын-сүргінге ұшыраған және 25 мың адам ату жазасына кесілген.  Осы жылдары қазақстанның ғылым, мәдениет және саясат саласының зиялы қауым өкілдері атылған. Бүгін саяси қуғын-сүргін құрбандарын Қостанай қаласының тұрғындары мен зиялы қауым өкілдері және билік өкілдері еске алды. Олар ескерткішке гүл шоқтарын қойып, тарихи деректерге шолу жасады.  

29-мамырда  Е.Өмірзақов атындағы Қостанай облыстық филармониясының концерт залында  Қазақстан Республикасының  мәдениет қайраткері, Қазақстанның құрметті журналисі, ақын, жазушы, драматург Ақылбек Шаяхметтің шығармашылық қызметінің 50 жылдығына арналған  кеш өтті. Кеште ақынның жаңа кітаптарының («Сөз», «Дәстүр», «Голос степи», «Каскалар мен маскалар», «Нар қазақ – намысы бар қазақ») тұсаукесері болды.   Филармония  фойесінде  кітап көрмесі ұйымдастырылды. Ілияс Омаров атындағы Қостанай қазақ драма театрының актерлары  жазушының «Өкініш», «Ыбырайдың өсиеті» спектакльдерінен үзінділер көрсетті. Ақын сөзіне жазылған әндер орындалды. Ақын ағамызды  оқырмандары мен  қаламгер достары, жергілікті билік өкілдері құттықтай келіпті. Сондай-ақ, ҚР Мемлекеттік сыйлығының лауреаты Қойшығара Салғарин мен жазушы, драматург, қоғам қайраткері Төлен Әбдік шығармашылық кештің құрметті қонақтары болды. Ал облыс әкімінің атынан  әкімнің орынбасары Марат Жүндібаев құттықтау сөз сөйлеп, арнайы сыйлықты табыс етті. Ақылбек Қожаұлының туған жері, Жітіқара ауданының  әкімі Абай Ыбыраев та құр қол келмеді.   «Жітіқара ауданының құрметті азаматы»  атағын табыстады. Сонымен қатар Ақылбек Шаяхметті ҚР-ның халық ақыны Әсия Беркенова, Қазақстанның еңбек сіңірген қайраткері, ақын Қойшығұл Жылқышиев, ғалым, жазушы Қойшығара Салғарин,  жазушы-журналист Өтеген Әбдіраман құттықтап, замандас достарына арналған өлеңдерін оқыды. Кеш иесі де өнер сүйер қауымды құр жібермей,  жырымен сусындатты.     

24-мамыр күні А.Байтұрсынов атындағы Қостанай мемлекеттік университетінде  «Халықаралық академиялық қозғалыс және магистратурадағы екі диплом бағдарламасы» тақырыбында  онлайн-конференция өтті. Конференцияға Ресейдің  Александр және Николай Столетовтар атындағы Владимирский мемлекеттік университетінің өкілдері ғаламтор  желісі арқылы тікелей қосылды. Іс-шараның мақсаты - Қазақстанның және Ресейдің жоғарғы оқу орындарының академиялық қозғалысын жетілдіру. Ал міндеті: бірлесіп жұмыс істеу мүмкіншілігін және оның бағыттарын анықтау. Сондай-ақ екі елде бір-бірінің  оқу құжаттарын жарамды деп тануға жұмыс жасау, еркін магистрлік тәжірибеден өту. Онлайн-кездесу барысында бірнеше баяндамалар тыңдалды.  Іс-шара соңында университеттер өкілдері академиялық қозғалыс және магистратурадағы екі диплом бағдарламасы аясында екі жақты келісім жасау керек  деп шешті. 

Мамыр айының 23-і күні Францияның Бургундии университетінің профессоры Дэниэл Рейчварг оқу ордамызға іс-сапармен келді. Профессордың ҚМУ-ға келген  мақсаты – екі университет арасындағы ынтымақтастық туралы мәмілеге келу. Сондай-ақ Бургундии университетіндегі автомобиль және тұрақты даму институтының  директорымен, халықаралық бөлімнің бастығымен интернет арқылы тікелей қосылып, бірлесіп жұмыс істеудегі бірнеше мәселелер талқыланды. Мәселен, қандай  бағыттар бойынша жұмыс жасалады және Бургундии университетінің профессорларының біздің магистранттарға дәріс беруі туралы сөз болды. Екі университет арасындағы ғылыми және академиялық ынтымақтастық мынандай бағыттар бойынша  жүргізіледі:                         -  Машина жасау (автокөлік құралдарын , олардың бөліктері   мен қозғалтқыштарды өндіру; ауылшаруашылығы техникасын жасау)          - Азық-түлік өндірісі (сүт өнімдерін қайта өңдеу технологиясы ,  ет өнімдері , ұн және макарон өнімдерін өндіру , өсімдік майларын  өндіру , өңдеу технологиясы)