EXPO-2017 – елімізде өткізілетін маңызды іс-шара. Бұл көрменің маңыздылығы туралы барлық бұқаралық ақпарат құралдарында айтылуда. Дүниежүзілік көрме – Қазақстанның елеулі жобаларының бірі. Халықаралық көрмені тамашалаймын деушілерге билеттер қазірден бастап сатылуда. EXPO-2017  көрмесіне волонтер ретінде де баруға болады. Осындай мүмкіндікке ақпараттық технологиялар факультетінің «Математика» мамандығының 2-курс студенті Умиртаева Динара ие болды. Қостанай облысының атынан баратын 100 волонтердің құрамына кіру үшін студенттер біраз тер төкті. Біріншіден, олар сауалнаманы толтырып, сұхбаттасудан өтті. Сұхбаттың негізгі сұрағы – «Неліктен мен EXPO-2017 көрмесіне қатысқым келеді?» болды. Сұхбаттасудың нәтижесінде 120 волонтер таңдап алынды. Бірақ нағыз волонтер атану үшін бұл жеткіліксіз болды. Екі ай бойы студенттер іс-шараларға қатысып, өздерін жан-жақты көрсетті. Ең бірінші міндет – дайындық курстарын қалдырмау. Сонымен қоса студенттер «Тәуелсіз Қазақстанның жетістіктері» тақырыбында түрлі іс-шараларды ұйымдастыру, жастар форумына белсенді ат салысу, ағылшын тілінде ән айту, видео түсіру сияқты тапсырмаларды орындады. Осы және тағы да басқа сынақтардан өте білген студенттер ғана «Астана EXPO-2017» ұлттық комитетінің атынан берілген сертификатқа ие болды. Осы үлкен мәртебеге ие болған Динараға үлкен жетістіктер мен биік белестерден аса беруін тілейміз.

Экономикалық факультетінде Ы. Алтынсариннің туғанына 175 жыл толу мерейтойына орай арнайы семинар-сайыс өткізілді. Іс-шараның мақсаты – келешек ұрпақты қазақ тілін құрметтеуге баулу, қазақ тілінің құдыретін сезіндіру. Сайысқа қатысушылар Ы.Алтынсариннің өлеңдерін мәнерлеп оқудан сынға түсті. Әділ-қазылар алқасы жеңімпаздарды көркем шығарманы оқу шеберлігі, сөйлеу сауаттылығы, сахналық мәдениет, орындау үлгісі, бейнеге кіру деңгейі және мәтіннің мәндік құрылымы бойынша таңдады. Сайыстың жеңімпаздары арнайы сыйлықтар мен мадақтама, дипломдармен марапатталды.

Бас ғимараттың акт залында «Психология» мамандығында біліп алып жатқан 4 курс студентерінің оқуы аяқталуына арналған мерекелік кеш іс-шарасы өтті. Гуманитарлық-әлеуметтік факультетінің деканы С.Ж.Берденова мен психология және педагогика кафедрасының меңгерушісі С.Т.Жумарова оқуда өздерінің жоғары белсенділіктерін көрсеткен студенттерге арнайы алғыс хаттар мен құрмет грамоталарын тапсырды. Топ эдвайзері О.В.Ельчищева әр студенттің еренкшеліктерін атап арнайы өзі дайындаған «психологиялық» мадақтамаларды тапсырды. Студенттер де қалыс қалмай ГӘФ оқытушыларына жоғары білім беріп, кәсіби тұрғыдан дамуға септігін тигізгендері үшін алғыстарын білдірді. Кештің соңында 4 курс старостасы С.Ткенова 3 курс старостасы А.Колпаковаға «Психология білім кілтін» тапсырды. Кеш жоғары деңгейде өтті. Студенттер бір-біріне жылы лебіздерін білдіріп, жаңа өмірде шығармашылық табыс тіледі.

А.Байтұрсынов атындағы Қостанай мемлекеттік университетінің мәжіліс-залында қалалық және облыстық БАҚ редакторлары және Қостанай облысының ішкі саясат басқармасы басшысының қатысуымен «Мультимедиатехнология жағдайындағы аймақтық БАҚ» тақырыбында дөңгелек үстел өтті. Дөңгелек үстелдің басты қатысушысы филология ғылымдарының докторы, «Высшая школа экономики» ұлттық зерттеу университетінің профессоры (медиа, коммуникация және дизайн факультеті), медиакоммуникация саласындағы Қолданбалы зерттеу орталығының ғылыми жетекшісі, телевидение және радио Еуразия Академиясының мүшесі Иосиф Михайлович Дзялошинский «Журналистика әлеуметтік институт жүйесінде» мәселесі төңірегінде өз ойын айтты. Сонымен қатар дөңгелек үстелге А.Байтұрсынов атындағы Қостанай мемлекеттік университеті «Журналистика» мамандығының студенттері қатысып, сұрақтар қойды. Кездесу жоғары деңгейде өтті.

7 желтоқсан күні  – «ҚМУ – игі істер аймағы» бағдарламасын жүзеге асыру шеңберінде және Тәуелсіздіктің  25-жылдығына орай «Қаржы және банк ісі» кафедрасының студенттері Қостанай қаласының  балалы аналарды бейімдеу орталығында болды. Студенттер орталықтың кішкентай тұрғындары үшін тәттілер, жемістер және ойыншықтар салынған қалта дайындаумен қатар, оларға ойын мен билерден құралған музыкалық бағдарлама ұсынды. Студенттер балалармен ойын ойнап, қамқорлық көрсетіп көңілдерін көтеруге тырысты. Қайырымдылық акциясы тек қана балалар мен олардың аналары үшін ғана емес, оған қатысқан жастар үшін де  қажет болып шыққаны сөззсіз. Осындай іс-шаралар «Үлкен ел - үлкен отбасы» деген сөдің мағынасын толығынан түсінуге және өздерінің азаматтық жауапкершілігін көрсетуге, қоғамға қажеттілігін сезінуге мүмкіншілік береді. 

Астана қаласында Бейбітшілік пен Келісім сарайында XI Инновациялық конгресс өтті. Биылғы жылы конгресске қатысушылар Қазақстан Республикасы үшін маңызды төрт бағытқа ерекше назар аударды. Олар: энергетика, жаңа материалдар, ақпараттық және коммуникациялық технологиялар (автоматтандыру, роботтандыру, цифрлендіру), агроөнеркәсіп кешеніндегі терең өңдеу. Конгресті Инвестициялар және даму министрлігінің қолдауымен «Технологиялық даму жөніндегі ұлттық агенттік» АҚ (ТДҰА) ұйымдастырды. Конгресске халықаралық және қазақстандық сарапшылар, үкімет пен жергілікті атқарушы билік өкілдері, ұлттық холдинг пен ұлттық компаниялардың басшылары, даму институттары, ҒЗИ және ұлттық инновациялық жүйенің негізгі қатысушылары  қатысты. Нәтижесінде, 300 адамнан 30-ы Ұлттық инновациялар байқауының финалына шықты. Олардың қатарында А. Байтұрсынұлы атындағы Қостанай мемлекеттік университетінің «Есептеу техникасы және бағдарламалық қамтамасыз ету» мамандығының 2 курс студенті Мухтаров Данияр болды. Комиссия мүшелері Даниярдың баяндамасын жоғарғы бағалап,  оны арнайы дипломмен марапаттады. Сонымен қатар, естелік сый ретінде ұялы телефон табысталды. АТФ ұжымы Даниярға шығармашылық табыс, оқуда озат болуына тілектестігін білдіреді.