А.Байтұрсынов атындағы Қостанай мемлекеттік университетінің заң факультетінің Қылмыстық құқық және процесс кафедрасында оқытушы Л.Т.Нурханованың ұйымдастыруымен Қостанай облысы кәмелетке толмағандардың істері жөніндегі мамандандырылған ауданаралық сотының төрайымы Айзада Марданқызы Жәнібековамен кездесу өтті. Арнайы шақырылған қонақ 2-ші, 3-ші курс студенттеріне «Қостанай облысы кәмелетке толмағандардың істері жөніндегі мамандандырылған ауданаралық сотының өткені мен бүгіні» тақырыбында арнайы баяндама дайындап, әңгімелеп берді. Кездесу барысында студенттер аталған соттың ең алғаш құрылған жылындағы және қазіргі қызметтері, мемлекеттік қызметшілердің ар-намыс кодексі, судьяға қойылатын талаптар туралы ақпарат тыңдады. Кәмелетке толмағандарға қатысты әкімшілік, азаматтық, қылмыстық істер бойынша студенттер сұрақтар қойып, оларға нақты жауаптар алды. Нәтижесінде А.М. Жәнібекова кафедра ұжымына және кездесудің қатысушыларына арнайы әдебиеттер ұсынып, студенттерге оқуда сәттілік тілеп, көрсетілген құрмет үшін алғысын білдірді.

Қазақстан Республикасының мемлекеттік қызмет істері және сыбайлас жемқорлыққа қарсы Агенттігінің Қостанай облысы бойынша департаментімен А.Байтұрсынов атындағы Қостанай мемлекеттік университетінің экономикалық факультетінің жоғары курс студенттерімен «Мемлекеттік қызметке кіру» тақырыбында кездесу өткізілді. Аталған іс-шара аясында ҚМУ студенттеріне Департаменттің мемлекеттік қызметті бақылау басқармасының жетекшісі Салыкбаев Е.А. және мемлекеттік қызмет басқармасының бас маманы Кабылова Г.Ж.  мемлекеттік қызметке кіру кезінде өтетін конкурстық тәртіп туралы, сондай-ақ, тестілеудің өту тәртібі туралы айтты. Бұдан басқа, мемлекеттік қызметкерлер мемлекеттік қызметтің имиджі мемлекеттік органдардың халыққа көрсететін қызметтердің сапасына байланысты болатынына назар аударды: мемлекеттік қызмет туралы заңнаманың әрі қарай жетілдірілуі, мемлекеттік қызметкерлердің өзін-өзі ұстау әдеп нормаларын нығайту, халықтың мемлекеттік билік органдарына сенімін арттыру. Студенттерге бос мемлекеттік қызметкер лауазымдарына тест сынағынан өтуге ұсыныс жасалынды. Салыкбаев Е.А. өз сөзінде айтып кеткендей, қазіргі уақытта Қостанай облысындағы мемлекеттік қызметкерлердің саны шамамен 6,5 мың маманды құрайды және жыл сайын 3-4 мың түлек «осы беделді мамандықта» өзін көрсетуге талпынады. Таңдаудың бірінші сатысынан қатысушылардың 54 %-ы ғана өтуі, сұхбаттасуға шақырылған «үздіктердің ең үздігі» таңдалатынын айқындайды. Сол себепті түлектердің басты міндеті – жақсы оқу мен елінің, қоғамның және мемлекеттің дамуына өз үлестерін қосу болып табылады.

Қымбатты арулар,  «Арулар Отауы» клубы мен «Пресс-служба КГУ» Сіздерді, «Асыл Ару - 2017» сұлулық пен өнер сынына шақырады. Қатысам деушілерге өтініш-анкета толтырып, толық бойы мен иықтан жоғары түскен екі фото тапсыру керек. Өтініш-анкеталарды қабылдау «Арулар Отауы» клубының онлайн ВК желісіндегі группада жүргізіледі.

А.Байтұрсынов атындағы ҚМУ мен Қостанай облыстық прокуратурасының арасында 1.08.2015 жылы бекітілген №40 келісім шартты жүзеге асыру аясында студенттердің кәсіби тәжірибесін жүргізу бойынша Заң  факультетінде «Қазақстан Республикасының прокуратура органдарына қабылдау ережесі» бойынша тәжірибеге бағытталған сабақ өтті. Іс-шараға университетіміздің 1, 2, 3 курс студенттері және профессор-оқытушылар қатысты. Қостанай облыстық прокуратурасының кадр жұмысы басқармасының бастығы Р.А.Туланова болашақ мамандарға прокуратура мекемесінде қызмет етудің шарттары, үміткерлерді іріктеу байқауының ережелері және тексерістен өтудің маңыздылығы туралы әңгімелеп берді. Сондай-ақ, Р.А.Туланова студенттердің қойған қызықты сұрақтарына толық жауап берді.

Бүгін, «Еxро-2017» көрмесіне арналған «KGU CUP XI» республикалық пікірсайыс турнирі өз мәресіне жетті. Турнирге Астана, Көкшетау, Қызылорда, Алматы, Қарағанды, Қостанай қалаларынан 24 команда қатысты. Дәстүрлі турнирді университетіміздің «Ахмет ұрпақтары» зияткерлік пікірсайыс клубы ұйымдастырған еді. Турнир қорытындысы бойынша қазақ лигасында «Үздік спикер» атағын Ауесханов Дәурен иеленсе, Аманжол Ботагөз «Үздік төреші» титулына ие болды. Финалдық ойындар нәтижесі бойынша: 1-ші орынды Сембиев Әділет пен Ерқанат Нұрахметтен құрылған «Мы как Харви, только дебатеры» (Көкшетау қ.) командасы алса, 2-ші орынды Бекарыстан Аманжолов пен Нұртуған Өмірзақ (Астана қ.) алды. Ал, 3-ші орын Астаналық пікірсайысшы қыздар Алима Егінбаева мен Мақпал Үмбетоваға берілді.

2016-2017 оқу жылының қысқы демалыс күндерінде Қаржы мамандығының студенттері Қазтұтынуодағы Қарағанды экономикалық университетінде тәжірибеден өтті. «Қысқы мектеп» бағдарламасы бойынша оқу барысында олар ЖОО оқыту жүйесімен танысып, «Банктік тәуекелді басқару» және «Коммерциялық банктегі есеп және есеп беру»  пәндерін меңгерді. Студенттердің айтуынша, оларға сабақты өткізу әдістемесі ерекше ұнады. Сабақтар интерактивті, пікір-талас, іскерлік ойын және дөңгелек үстел түрінде өтті.  ҚМУ студенттері Қарағанды, Павлодар және Малайзия қалаларынан келген студенттермен танысып, тәжірибемен алмасты. Сонымен қатар, студенттер  ағылшын тілінде өздерінің біліктілігін арттырды. Болашақ мамандар Теміртау қаласындағы ҚР Тұңғыш  Президентінің мұражайына, Қарағанды өлкетану және Долинка (п. Карлаг) мұражайларына барып, мүсіндермен танысты. Көрмеден кейін, жастар  "Сарыарқа" ХК хоккей матчын тамашалау мүмкіндігіне ие болды. Қаржы мамандығының студенттері келесі оқу жылының қысқы мектебіне тағы да қатысу ниеттерін білдірді. Олар іс-шараны ұйымдастырушыларға және Қазтұтынуодағы Қарағанды экономикалық университетінің тәрбие жұмысы жөніндегі деканның орынбасарына жайлы жатақхана және қызықты демалыс күндерін ұйымдастырғаны үшін алғыс білдіреді.