ҚМУ-дың экономикалық факультетінде «Үздік куратор» байқауы өтті. Сайыс екі кезеңнен тұрды: бірінші – іріктеу, екінші – куратормен танысу және кураторлық топпен жұмыс жасау. Бірінші кезең аяқталған соң, бірден екінші кезең басталды. Онда кураторлар студенттермен жұмыс жүргізу қабілеттерін көрсетіп, өздерін презентация мен өлең шумақтары арқылы таныстырды. Кураторлардың жанкүйерлері өз жетекшілерін қолдап, белсенділіктерін көрсетті. Әділқазылар алқасының шешімі бойынша жеңімпаздар анықталды: 1-ші орынды экономика факультетінің оқытушысы Гүлзат Байзақова иеленсе, 2-ші орын қаржы және банк ісі кафедрасының оқытушысы Айнұр Салькинаға берілді. Ал, 3-ші орынды басқару және іскерлік әкімшілік кафедрасының оқытушысы Диана Мұратова жеңіп алды. Нәтижесінде Гүлзат Байзақова экономикалық факультеттің «Үздік кураторы» атағына ие болып,  ҚМУ-дың «Жылдың үздік кураторы» сайысына жолдама алды. Іс-шараны ұйымдастырушылар байқаудың өтуіне септігін тигізген және белсенділік танытқан кураторларға алғыс білдіріп, шығармашылық табыс тіледі.

Скрининг – бұл ауруларды немесе қауіпті факторларды ерте сатысында анықтау үшін белгілі бір жастағы сау тұлғаларды алдын ала профилактикалық медициналық тексеруден өткізу, емдеу тиімділігін арттыру және асқынушылықты алдын алу шарасы. Экономикалық және аграрлық-биологиялық факультеттің профессор-оқытушылары, қызметкерлері мен білім алушылары жұмыс орны мен оқуда жүріп арнайы тексеріс скринингтен тегін өту мүмкіндігіне ие болды.  Жалпы акцияға университетіміздің 120 астам  қызметкерлері мен студенттері қатысты. А.Байтұрсынов атындағы ҚМУ-дың №2-ші ғимаратында №1-ші қалалық емхананың білікті дәрігерлері мен ҚМУ-дың алғашқы медикалық-санитарлық көмек көрсету орталығының медициналық қызметкерлері бірлесіп скрининг өткізу орталығын ұйымдастырды. Барлық ниет білдіргендер өз салмағын, бойын білуге, көз қысымын және қанындағы қант деңгейін өлшеуге мүмкіндік алды. Жасалған зерттеулер нәтижесінде дәрігерлер тексеруден өткендерге ұсыныстар жазып, талдау жасауға қосымша бағыт берді.  

А.Байтұрсынов атындағы ҚМУ-дың №2-ші ғимаратының 103 дәрісханасында экономикалық факультеттің ұйымдастыруымен мемлекет басшысы Н.Ә.Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауын талқылауға арналған кездесу өтті. Кездесудің модераторы э.ғ.д., профессор С.М. Жиентаев болды. Іс-шараға 100 астам адам: университетіміздің профессор-оқытушылар ұжымы мен студенттер қатысты. Кездесуді өткізу барысында э.ғ.д., профессор С.М.Жиентаевтың, э.ғ.к., экономика кафедрасының аға оқытушысы С.У.Турежановтың, ф.ғ.к., философия кафедрасының аға оқытушысы Д.А.Качеевтің баяндамалары тыңдалды. Іс-шарада Қазақстанның экономикасын жаһандандырудың мәселелері мен келешегі, АӨК шағын-кластерлік өндірістері қалыптасуының әлеуметтік-экономикалық шарттары, жанжалдар және оларды шешу жолдары талқыланды. Аталған іс-шара оқытушылар мен студенттердің үлкен қызығушылығын тудырды. Болашақ маман иелері өздерін қызықтырған сұрақтарын қойып, тақырыпты талғылауда белсенділік танытты.

А.Байтұрсынов атындағы Қостанай мемлекеттік университетінің психология және педагогика кафедрасының зертханасында «Эмоционалды күйді реттеу» атты семинар-тренинг өткізілді. Іс-шараның модераторлары лаборанттар Жанагүл Ромашева мен Гүлзат Ибраева болды. Тренингтің негізгі мақсаты – қатысушыларды психологиялық өзін-өзі реттеу тәсілдерімен таныстыру, нәтижелі жұмыс істеу үшін қолайлы жағдай жасау. Тренинг барысында қатысушылар деструктивті және стереотипті күйзелу жағдайларды алдын-алу тәсілдерін игерді. Іс-шараның аяғында босаңсуға, эмоциялық ширығуды алып тастауға және әрі қарай табысты жұмысқа бейімделуге бағытталған жаттығулар орындалды.

ҚМУ-дың ақпараттық технологиялар факультетінің әдістемелік инновациялар айы шеңберінде бағдарламалық қамтамасыз ету кафедрасы «What? Where? When?» жыл сайынғы зияткерлік ойынын өткізді. 2012 жылы «Есептеу техникасы және бағдарламалық қамтамасыз ету» мамандығына көп тілді білім беру жүйесін енгізгеннен кейін, осы ойынды өткізу идеясы ұсынылды. Ойының негізгі мақсаты – студенттердің зияткерлік қабілеттерін арттыру және басқа тілдерге деген қызығушылығын ояту. Іс-шара «Есептеу техникасы және бағдарламалық қамтамасыз ету» мамандығының 2 курс студенттері, топтардың эдвайзерлері мен кураторларның ұйымдастыруымен өткізілді.  Жастар әртүрлі тақырыптарға байланысты қазақ, орыс, ағылшын тілдерінде қызықты сұрақтарды дайындап бір-біріне қойды. Ойын барысында топтар таңдалған сұрақтарға жауап беріп, жиналған ұпай саны бойынша жеңімпаз анықталды.  Оларға арнайы дипломдар мен бағалы сыйлықтар берілді. Жарыстың қорытындысы бойынша «Ең үздік ойыншы» атағы Аманжол Қазовқа берілді. Бағдарламалық қамтамасыз ету кафедрасының меңгерушісі Ольга Салыкова, оқу жұмысы бойынша деканның орынбасары Гүлшат Махамбетова, арнайы шақырылған қонақ, Қостанай қаласындағы ағылшын тілі оқытушысы Генри Онвулану ойынның сарапшылары болды. Қатысушылар іс-шараны жоғары деңгейде өткізген байқау ұйымдастырушыларына алғыс білдірді.  

2017 жылдың 15-ші сәуірінде бас ғимараттың акт залында «Қозы-Көрпеш – Баян-Сұлу» ұлттық ғашықтар күніне арналған «Шаңырақ» театрының ұйымдастыруымен «Махаббат дастаны» атты лирикалық кеш өтті. Іс-шараға университет басшылығы мен барлық факультеттің студенттері қатысты. Университетіміздің дарынды жастары сахналық шеберліктерін көпшілікке паш етті. Кеште махаббат туралы Қазақстанның белгілі ақын, жазушылардың өлеңдері оқылып, ән шырқалды. Іс-шара жоғары деңгейде өтті.